柔佛同 JAKIM 斷交：馬來西亞瓦解在即

柔佛州 JAKIM (伊斯蘭發展局，Jabatan Kemajuan Islam Malaysia) 嘅宗教師扎米漢，公開撐只限回教徒嘅洗衣店，發表公然歧視華人嘅謬論，不單被柔佛蘇丹當眾駁斥，而且柔佛蘇丹更宣布，同 JAKIM 斷交，柔佛宗教局無須再聽取任何嚟自JAKIM嘅建議，呢次事件非比尋常，隨時就係馬來西亞瓦解嘅導火線。

JAKIM 被沙特佬把持嘅結果

JAKIM 本來係Majlis Raja-Raja(統治者會議)決議成立嘅，本來係維護馬來西亞各州屬回教教義一致性，話雖回教事務係各州元首嘅專有事權，但依家柔佛州蘇丹公開同呢個機構反面，即係話，柔佛蘇丹同聯邦政府，甚至其他州屬喺回教睇法有重大分歧，咁玩法非同小可，所以我話 JAKIM 斷交，即係柔佛州隨時宣布離開馬來西亞，呢個係首相署公署以及 JAKIM 要儘快派人覲見蘇丹嘅原因。

呢次搞出事，其中一個背景係馬來西亞近年有太多喺沙特讀書嘅宗教師亂噏廿四，但馬來西亞唔同新加坡在於，新加坡唔會俾呢啲沙特嚟嘅宗教師立亂傳教，如有必要就引用《宗教和諧法》趕走呢班瘟神先講，因為沙特留學嘅宗教師同DAESH根本係關係密切，所以係一定要趕走佢地。但納吉政府根本係任由呢班友亂嚟(仲要中共請巫統出席十九大，真係仆街有樣睇，仲要有五毛上嚟搗亂)。所以柔佛蘇丹果斷先發制人，借扎米漢呢件事，同聯邦政府嘅極端走向劃清界線。

另一方面，柔佛蘇丹已經想將柔佛「新加坡化」，變成一個保留君主立憲制嘅多種族國家，同聯邦政府以及部分馬來州屬磨擦不斷，柔佛由蘇丹專機，到教育英語化，都處處反映柔佛隨時準備獨立，相信呢次有機會成為分家嘅導火線，一旦柔佛州宣布獨立，以華人為主嘅檳城、雪蘭莪會走，東馬嘅沙巴同砂磱越都會走，屆時馬來西亞解體一定大亂，北馬嘅州份有可能塔利班化，而霹靂州同接近檳城嘅吉打州隨時變戰場(呢個亦係馬哈迪醫生必須同林吉祥、安華聯手搞掂納吉嘅原因)。最後結果，有可能係新加坡要出兵馬來半島平亂。呢個亦係點解新加坡必須出現一位馬來人回教徒總統嘅背景嚟。

馬來西亞玩到咁，依家睇馬哈迪醫生能否妙手回春。