逃犯條例 大混戰，發展完全出乎香港政界一貫抗爭模式，由法案委員會出現兩個版本，令立法會秘書處嘅合法性徹底破產，跟住兩個委員會同一個地方開會，爆發史無前例嘅議事抗爭，范國威更因此受傷入院，陳恆鑌包繃帶包到錯晒，扮嘢穿晒崩。其實呢一役，不單一改泛民無用嘅形勢，而且為香港改朝換代揭開序幕，其實中共喺香港已經氣數已盡，但過程好可能十分之血腥。
逃犯條例 嘅赤裸違約
逃犯條例 係一個典型張曉明式有權用盡嘅思維做法，喺張曉明、習近平等人眼中，佢哋一直認為《中英聯合聲明》係歷史文件，呢個係同納粹黨對但澤自由市嘅態度係一樣(但澤自由市係凡爾賽和約嘅產品，德裔人士享有高度自治權，但主權唔屬於德國，而波蘭亦享有部分但澤嘅權利，包括喺當地設立郵局及港口)，而由英國解密嘅文件顯示，其實 逃犯條例 唔涵蓋中國本土、台灣以及澳門，就係一個特別安排，故意嘅，係保證《中英聯合聲明》有效履行嘅部分，依家中國咁玩，係根本赤裸違約，呢個係唔駛講。
以往西方國家喺民主運動支援唔夠，一方面香港人抵抗唔夠，另一方面，喺冷戰前，因為要拉攏中國共同抵抗蘇聯，喺冷戰後，就為咗利用中國廉價勞動力，以及中國經濟起飛嘅龐大市場，所以未有認真採取行動，馬英九呢啲仆街可以講對中國綏靖雖然美國利益，都係咁樣嘅背景得出嚟。
但依家形勢好唔同，遮打革命同魚蛋革命證明香港人會抵抗到底，而且啱啱好Trump上台，你話Trump點都好，佢對中國嘅異常清醒，令佢成為台灣同香港抵抗中國嘅後盾。對好多泛民嘅人嚟講，美國嘅態度係重要，喺遮打革命果陣，美國都唔敢撐到底，但依家係完全唔同，甚至支持得更硬淨。而民眾亦要求革命，焦土派之所以呃神騙鬼，多少因為泛民唔夠激，依家再無外交上嘅顧慮，泛民亦意識到必須孤注一擲，改朝換代，亦由呢度開始。
革命時代嘅開始
如果你只係認為，依家立法會嘅抗爭，只不過係台灣式嘅議事抗爭，我並唔係咁睇。台灣嘅議事抗爭，其實去到黨禁結束後，多少帶有表演成分，當然係因為當時台灣傳媒嘅不公不義，雖然透過呢啲畫面，俾台灣民眾知道有班人搏緊命，而且存在，但台灣政治大勢同亞洲其他國家一樣，係向現代化一方走，但香港唔係，依家香港面對一個傲慢程度同Louis XVI一樣嘅政權同當政者，而相關人等用嘅手段同思維方式係納粹德國嘅一套，納粹德國係人類歷史上其中一個最反人類嘅殘暴政權。而台灣都未曾另立議會，但香港實際上出現兩個議會，甚至兩個政府都遲早會出現，理論上，1997年6月30日嘅英治政府同議會，喺技術上係「後會無期」，佢可以in exile，否則中共唔會對今日公認嘅香港國旗，1997年香港殖民地旗如此忌憚。
香港主權最終走向，各方未必有共識，但恢復1997年6月30日果陣嘅香港政府同狀態，呢個係可以係香港各方面嘅共識。當《中英聯合聲明》明目張膽違反果陣，香港復國運動，就係順理成章，你話歸英、你話獨立，都可以同一樣嘢嚟，呢個正係革命火苗所在。而且恢復香港到1997年6月30日係合情合理，因為《南京條約》同《北京條約》仍然有效，當 逃犯條例 代表嘅《中英聯合聲明》最後保障消失，香港返到聯合王國，甚至英女王本人嘅懷抱，呢個係十分之順理成章。
有首歌，香港唔少人聽過，係Blue Jeans 藍戰士一曲嘅原版，蘇格蘭樂隊Marmalade 嘅 Reflections Of My Life，以下歌詞或者係香港人嘅心聲
All my crying (all my crying)
Feel I’m dying, dying
Take me back
To my old home
I’m changing
Arranging
I’m changing
I’m changing everything
Ah, everything around me
The world is
A bad place
A bad place,
A terrible place to live
Oh, but I don’t wanna die
1998年，英國政府爭取北愛民眾支持Good Friday Agreement嘅電視廣告，正係用呢首歌，當然Tony Blair係夾band出身，佢嘅口味係無得彈。如果用呢首歌，作為要求香港回歸英國嘅一首歌，再配合5月11日嘅混戰畫面，9月28日嘅催淚彈，年初二嘅亂石，都應該好多人明乜事。
當年英國政府嘅廣告
後話：Reflections Of My Life我識呢首歌，係我童年喺港島北部聽BFBS(英軍電台)果陣知呢首歌。事隔二十幾年，再聽係完全另一種感覺。