全世界各地嘅電視台,尤其德國同英國重點報導香港 反送中 抗爭,呢個好正常,但依家德國報導嘅情況,係積極到有啲唔尋常,因為ZDF兒童新聞logo!係報過兩次,真係慌死啲細路唔知香港發生緊乜事。當然,我明白呢個有德國方面一啲考慮,但我都要先介紹一下,德國電視點做兒童公民教育。
德國ZDF點向細路講 反送中
因為我唔係呢度搞德語教育,所以我Embedded咗YouTube上有中英文字幕嘅版本,俾大家睇咗先。
logo呢個節目,係唔少人自學德語嘅其中一個節目,因為佢俾細路睇,你可以消化得到啲德文。但呢個節目反映咗德國係好早打好通識教育嘅基礎,俾細路好早就可以知道唔同時事議題嘅來龍去脈,一如Der Spiegel有細路仔版Dein Spiegel,我之前係介紹過,但無實物睇係另一回事,依家如果有心做好下一代教育,教育界中人應該點做,可以參考ZDF嘅做法。我喺德國生活都好,要將德國學返嚟嘅嘢回饋香港,我覺得係我嘅責任。
但我相信ZDF編務人員報兩次香港嘅原因,係為未來可能出現嘅新德國居民,即係香港人子弟,要解釋背景會簡單好多,有助融合。好老實講,雖然依家有兩百萬人大遊行,但香港會唔會爆發難民潮或移民潮係一個unknown嚟,如果喺新聞報導上已經講清楚呢啲背景,就免卻日後麻煩。當然,香港比中東好一啲係,中東果啲問題真係唔係三言兩語講得清,正如我嘅家世問題,南洋人嘅背景可以好亂,又係三言兩語講唔清,德國各大電視台係已經盡力令大家明白點解中東難民問題出現。而依家出現果啲邦份,唔少係屬於過去西德電視無法涵蓋嘅地區,無知之谷遺留嘅問題唔係一時三刻可以解決。
所以我寫呢篇文果陣,其實心情頗為複雜,一方面,ZDF呢個節目,我終於有切入點可以介紹,其實俾細路嘅新聞節目,點解無人諗要做好(佢啲infographic都好簡潔,大人睇都覺好睇),以前都有兒童日報,但另一方面,呢個反映咗德國人其實對香港局勢不無擔憂。
日本都有類似做法,TBS嘅道具新聞:
https://youtu.be/b6YsmCN-FEU